კავკასიის საერთაშორისო უნივერსიტეტის პროექტი შოთა რუსთაველის საქართველოს ეროვნული სამეცნიერო ფონდის 2024 წლის ფუნდამენტური კვლევების საგრანტო კონკურსის გამარჯვებულია.
კავკასიის საერთაშორისო უნივერსიტეტის სამეცნიერო კვლევითი პროექტი „ექსპორტზე ორიენტირებული ბიზნეს მოდელის ინოვაციის კავშირი კომპანიის ზრდის სახეობებთან: კონცეპტუალური მოდელის შექმნა ექსპორტზე ორიენტირებული ზრდის სტრატეგიების შემუშავებისთვის საქართველოს მაგალითზე“ 2024 წლის ფუნდამენტური კვლევების საგრანტო კონკურსის გამარჯვებულია.
კავკასიის საერთაშორისო უნივერსიტეტი არის პროექტის წამყვანი და თანადამფინანსებელი ორგანიზაცია. პროექტის პარტნიორები არიან ბიზნესის კვლევების და განათლების ინსტიტუტი და მართვის კომპანია GGM. კავკასიის საერთაშორისო უნივერსიტეტი პროექტის ფარგლებში მჭიდროდ თანამშრომლობს IDRAC-ის ბიზნეს სკოლის (საფრანგეთი) და პავიის უნივერსიტეტის (იტალია) პროფესორებთან.
პროექტის კოორდინატორია კავკასიის საერთაშორისო უნივერსიტეტის ბიზნესის და ტექნოლოგიების ფაკულტეტის ასოცირებული პროფესორი შორენა ქურდაძე.
პროექტი შეფასდა 48 (50) ქულით. 2024 წლის, ისევე როგორც 2023 წლის ფუნდამენტური კვლევების საგრანტო კონკურსში, კავკასიის საერთაშორისო უნივერსიტეტის პროექტები წარმოადგენენ კონკურსის ლიდერებს ბიზნესის და ეკონომიკის მიმართულებით.
კვლევითი პროექტის მიზანია ექსპორტზე ორიენტირებული ბიზნეს მოდელის ინოვაციისა (BMI) და კომპანიის ზრდის (firm growth) სახეობების ურთიერთკავშირის შესწავლა. პროექტის განხორციელების შედეგად გამოიკვეთება BMI ცვლადებსა და კომპანიის ზრდის სახეობებს შორის კავშირი და მათი ურთიერთგავლენა, რომლის შედეგადაც შეიქმნება კონცეპტუალური მოდელი ექსპორტზე ორიენტირებული კომპანიების „ზრდის ტკივილების“ და კრიზისების მართვისთვის საერთაშორისო გაფართოების დროს. კვლევითი პროექტი ითვალისწინებს მჭიდრო თანამშრომლობას საქართველოს ბიზნეს სექტორთან.
2024 წლის ფუნდამენტური კვლევებისათვის სახელმწიფო სამეცნიერო გრანტების კონკურსზე დარეგისტრირდა 528 საპროექტო განაცხადი. კონკურსზე წარმოდგენილმა პროექტებმა გაიარა ტექნიკური ექსპერტიზა რის შემდეგაც შეფასდა 491 პროექტი ევროპის სამეცნიერო ფონდის მიერ (European Science Foundation – Science Connect, ESF-SC). დასაფინანსებლად შეირჩა 111 პროექტი.